Eins og enginn verði morgundagurinn...

Meirihluti Sjálfstæðisflokks og Framsóknarflokks samþykkti í dag hagræðingu upp á 2,4 miljarða króna. Stærstur hluti þeirrar upphæðar er fenginn með niðurskurði á launum borgarstarfsfólks og skerðingu á þjónustu við börn og fjölskyldur þeirra.

Sárast er að horfa upp á eftirfarandi:

• Kennsla í  2.-4. bekk grunnskóla verður skert um eina kennslustund á dag. Alls gerir það skerðingu á námi barns um rúmar 15 vikur, eða eina önn á þessum þremur árum.
• Frá og með hausti verða frístundaheimili borgarinnar lokuð á starfsdögum kennara, foreldraviðtalsdögum, í jóla- og páskafríum. U.þ.b. 16 daga á ári.
• Starfsdögum verður fjölgað á leikskólum úr þremur í fjóra á ári - þar sem kvöldfundir verða færðir á dagtíma, en ekki er verið að auka þann tíma sem starfsfólk hefur til undirbúnings.
• Félagsmiðstöðvarhópar ÍTR og Vinnuskólans fyrir unglinga í áhættuhópi hafa ekki verið fjármagnaðir, sem þýðir að mikilvægt forvarnarstarf er í uppnámi og ekki er víst að hægt sé að bjóða öllu starfsfólki sviðsins vinnu.

Þessi hagræðing kemur til með að kosta meira en hún sparar - en meirihlutanum er sama um það. Hann ætlar að skila sléttu og snuðrulausu bókhaldi og heldur að þannig sýni hann fram á ábyrga efnahagsstjórn. Meirihlutinn áttar sig ekki á því að ábyrg efnahagsstjórn snýst ekki um að redda deginum í dag. Ekki heldur árinu í ár.

Ábyrg efnahagsstjórn er framsýn. Hún snýst um að koma í veg fyrir langvarandi neikvæð áhrif kreppunnar sem nú ríður yfir. Að læra af reynslu nágrannaþjóða okkar og byggja upp innviðin í stað þess að skera þau niður. Að hlúa að börnum og unglingum, efla atvinnustig fyrir foreldra þeirra, halda gjaldskrám í skefjum og jafna tekjumöguleika.

Sá meirihluti sem hér er við völd er ekki framsýnn. Gamaldags hægripólítík sem telur útsvar vera leið hins lata og hagræðir í þágu fylgis en ekki fjölskyldna er ekki ábyrg, heldur beinlínis stórhættuleg samfélaginu í Reykjavík.

Endurskoðuð fjárhagsáætlun samþykkt

Guð blessi Ísland!

Í ályktun Sjálfstæðisflokksins um fjölskyldumál (hvað annað?) er eftirfarandi kafla að finna:

Jafnrétti kostar ekkert

3. Sjálfstæðisflokkurinn sér jafnrétti sem eina af grunnstoðum sjálfstæðisstefnunnar. Í því er fólginn sá skilningur að meta eigi einstaklinginn á hans eigin forsendum. Því leggst Sjálfstæðisflokkurinn gegn öllum þeim aðgerðum sem hygla einum á kostnað annars.

4. Mikilvægt er að allir taki þátt í þeirri uppbygginu sem framundan er. Tilfinnanlega hefur skort á þátttöku kvenna í stjórnmálum og viðskiptalífi landsins. Þessu þarf að breyta. Sjálfstæðisflokkurinn þarf í öllu sínu starfi, hvort sem er innan flokks eða utan, að tryggja jöfn tækifæri óháð kyni.

5. Landsfundur vill tryggja jafnan rétt milli allra einstaklinga í landinu. Allir skulu vera jafnir fyrir lögum. Sjálfstæðisflokkur telur sértækar aðgerðir til að auka jafnrétti hels til þess fallnar að auka misrétti milli einstaklinga.

Sumsé. Þátttöku kvenna hefur verið ábótavant í stjórnmálum og því þarf að breyta af því að Sjálfstæðisflokkurinn þarf á öllum að halda, konum jafnt sem körlum. Hann ætlar samt ekki að viðurkenna samfélagslega skekkju sem hindrar að konur taki þátt til jafns við karla og enn síður að fara að grípa til aðgerða, enda yrðu þær til þess eins að auka á misréttið í samfélaginu.

Finnst einhverjum skrítið að lítið hafi áunnist í jafnréttismálum á undanförnum 18 árum?

Sanngirni og skattar

Alveg er hún merkileg, andúðin sem Sjálfstæðisflokkurinn hefur á sköttum. Í drögum að ályktun landsfundar þeirra um efnahags- og skattamál segir meðal annars:

Landsfundur leggst alfarið gegn þeim hugmyndum sem fram hafa komið um að hækka beri skatta umfram það sem nú þegar hefur verið ákveðið og harmar að þurft hafi að koma til þeirra skatta­hækkana sem lögfestar hafa verið á síðustu misserum. Frekari hækkun skatta væri tilræði við kaup­mátt almennings og myndi gera honum erfiðara að komast í gegnum efnahags­þrengingarnar sem nú eru hafnar.

Flokkurinn neitar ekki aðeins að horfast í augu við mikilvægi þess að auka tekjur ríkissjóðs og sveitarfélaga, heldur telur hann stórkostlegt óréttlæti falið í því að fólk greiði í þessa sameiginlegu sjóði okkar í hlutfalli við tekjur.

Í örvæntingu sinni gagnvart hinni ógurlegu félagshyggjuríkisstjórn sem nú situr, dregur Þorgerður Katrín fram hinn ógurlega, en fyrst og fremst gamla og lúna Skattmann til að hræða þjóðina. Skattmann með skikkjuna komi til með að gera eitthvað hræðilegt.

---

Það er nefnilega þannig að 18 ára valdatíð Sjálfstæðisflokksins hefur leitt af sér dýpstu kreppu í sögu lýðveldisins. Ef við ætlum að komast út úr henni verðum við bæði að draga úr útgjöldum og auka tekjur ríkissjóðs. Annað er ekki í boði.

Tillögur Vinstri grænna um hátekjuskatt eru sanngjörn og raunsæ leið til að afla tekna fyrir ríkissjóð. Þar er gert ráð fyrir 3% álagi á laun yfir 500 þúsund krónum á mánuði (milljón hjá hjónum) og 5% álagi til viðbótar á tekjur yfir 700 þúsun krónum (1.400 þúsund hjá hjónum). Álagið leggst aðeins á þær tekjur sem eru yfir þessum mörkum.

Þessar tillögur þýða 3.000 króna skatt til viðbótar fyrir fólk með 600 þúsund krónur á mánuði og 6.000 króna skatt fyrir fólk með 700.000 krónur á mánuði. Einstaklingur með 800 þúsund krónur á mánuði borgar 14.000 krónur aukalega og svo framvegis. Tilræðið við kaupmáttinn er nú ekki meira en svo.

Þessi leið hefði getað leitt til u.þ.b. 3,5 milljarða króna í tekjur fyrir ríkissjóð á síðasta ári, miðað við laun landsmanna í september 2008. Þá skal tekið fram að aðeins um 10% skattgreiðenda hefðu greitt þetta aukaálag, en hin 90% eru með lægri laun er viðmiðið gerir ráð fyrir.

Ég get ekki séð órættlætið sem í þessu felst. Né heldur ógnina sem steðjar af Steingrími J. Sigfússyni, sem nú vinnur hörðum höndum tiltekt og þrif eftir óráðsíu Sjálfstæðisflokksins undanfarin ár.

Skattmann er mættur aftur

Fjölmiðlaumfjöllun

Á heimasíðu DV í dag eru tvær fréttir hlið við hlið. Önnur er svona:

Nauðgun kærð í Vestmannaeyjum

Lögreglan í Vestmannaeyjum rannsakar nú kæru vegna meintrar nauðgunar sem sögð er að hafi átt sér stað aðfararnótt 22. mars síðastliðinn. Málsatvik liggja ekki ljós fyrir en skýrsla hefur verið tekin af meintum þolanda, sem er kona um fertugt, og meintum geranda, sem er karlmaður um þrítugt.

Hin er svona:

Ráðist á heimili bankamanns

Ráðist var á heimili Sir Fred Goodwin, fyrrverandi stjórnarformanns Royal Bank of Scotland, í Edinborg í nótt. Að minnsta kosti fjórar rúður voru brotnar og svört Mercedes Benz bifreið sem stóð fyrir utan heimili hans var skemmd.

Umfjöllunin tekur greinilega mið af eðli meintra glæpa og því viðhorfi sem einkennir samfélagið gagnvart þeim. Sjálfsagt þykir að fullyrða að ráðist hafi verið á heimili bankamannsins á meðan orðið "meint" er ítrekað sett sem fyrirvari inn í fréttaflutning af nauðguninni.

Sir Fred hefði vel getað valdið skemmdunum sjálfur, eða fengið einhvern til þess af einhverjum ástæðum. Ef blaðamönnum DV er svo mikið í mun að draga í efa þá glæpi sem tilkynntir eru, hefði þeim verið í lófa lagið að orða fréttina af innrásinni eitthvað á þessa leið:

Innrás á heimili bankamanns kærð

Lögreglan í Edinborg rannsakar nú kæru vegna meintrar innrásar sem sögð er að hafi átt sér stað á heimili Sir Fred Goodwin, fyrrverandi stjórnarformanns Royal Bank of Scotland, í Edinborg í nótt. Að minnsta kosti fjórar rúður voru brotnar og svört Mercedes Benz bifreið sem stóð fyrir utan heimili hans var skemmd.

Ég hef ekki fengið nein haldbær rök fyrir því að ástæða sé til að efast um kærur vegna nauðgana umfram önnur afbrot. Samt er fyrirvarinn "meint" afar sjaldan settur í umfjöllun um aðra glæpi. Hvernig skyldi nú standa á því?

Jöfn kynjahlutföll?

Sjálfstæðisflokkurinn tekur það fram að kynjaskipting sé jöfn í efstu 10 sætum á listum þeirra í Reykjavík. Þessi leikur er löngu orðinn úreltur, enda vita allir að Sjálfstæðisflokkurinn er ekkert að fara að ná inn 10 þingmönnum í hvoru kjördæmi.

Hafi Sjálfstæðisflokkurinn raunverulegan metnað á þessu sviði, þá ætti hann að leggja upp úr kynjahlutföllum í hverju lagi, þ.e. meðal oddvita, í öruggum sætum, í baráttusætum og í varaþingmannssætum. Það gerir hann ekki.

 

D-listar í Reykjavík birtir

Sjálfstæðisflokkur í boði Goldfinger

Það er sjálfsagt mál og eðlilegt að leiðrétta mistök. Þess vegna eiga flokkarnir að skila þeim peningum sem þeir áttu ekki að fá. Það er ekki einu sinni fréttnæmt.

Það sem aftur á móti orkar tvímælis er styrkur Goldfinger, eða Baltic ehf, til Sjálfstæðisflokksins. Ég get ekki ímyndað mér að almenn sátt ríki um það að kosningabarátta Sjálfstæðisflokksins sé háð fyrir fjármagn sem aflað er með hlutgervingu kvenna.

Goldfinger hagnast á sölu á aðgangi að líkömum kvenna. Jafnvel þótt þar þrífist ekkert sem stangast á við lög er starfsemin ósmekkleg í hæsta máta - enda markmiðið að hagnast á konum sem kynlífshjálpartækjum fyrir karla.

Vilji Sjálfstæðisflokkurinn hafa áhrif á ímynd sína ætti hann að skila styrk Goldfinger strax.

Skilar framlagi Neyðarlínunnar

Stöðugleiki og velsæld fyrir Evrópusambandið?

Efnahagshrunið hefur verið vatn á mylllu Evrópusinna, en margir þeirra telja einu leið okkar út úr kreppunni vera gegnum Evrópusambandsaðild. Þannig getum við komist í sterkan og öruggan gjaldmiðil, enda sé krónan rót alls ills. Mikil áhersla hefur verið lögð á að við drífum okkur hið snarasta inn í Evrópusambandið og tökum upp evruna með hraði, enda komist þannig á stöðugleiki og almenn velsæld.

Minna hefur þó farið fyrir umræðunni um þau skilyrði sem við verðum að uppfylla til að geta komist í myntbandalag Evrópu. Það er nefnilega ekki nóg að skella inn umsókn. Í Maastricht-sáttmálanum koma fram þau skilyrði sem þjóðum eru sett fyrir þátttöku í bandalaginu, skilyrði sem við Íslendingar komum varla til með að uppfylla í náinni framtíð. Þau eru:

1. Verðbólga sé ekki meira en 1,5% meiri en í þeim þremur Evrópusambandslöndum sem hafa minnsta verðbólgu.
2. Að í eitt ár séu meðalnafnvextir á langtímabréfum að hámarki 2% hærri en í þeim þremur löndum Evrópusambandsins sem hafa lægsta verðbólgu.
3. Að viðkomandi land hafi verið í gengissamstarfi Evrópu, ERM, í að minnsta kosti tvö ár án gengisfellingar og innan vikmarka.
4. Að fjárlagahalli sé ekki meiri en 3% af vergri landsframleiðslu.
5. Að heildarskuldir hins opinbera séu ekki meiri en 60% af vergri landsframleiðslu.

Takist okkur Íslendingum einhvern tíma að uppfylla þessi skilyrði verða efnahagsleg rök fyrir aðild að Evrópusambandinu orðin úrelt. Því er vandséð að að Evrópusambandsaðild sé sú töfralausn sem sumir vilja meina til að ná hér fram stöðugleika og almennri velsæld.

Ræða mín á landsfundi VG í kvöld

Kæru félagar!

Til hamingju með þennan glæsilega landsfund. Við höfum hér margar góðar ástæður til að fagna og vera glöð. Við njótum mikils fylgis, mikils trausts og höfum komið miklu og góðu til leiðar í langþráðri ríkisstjórn.

Á þessum stutta tíma sem okkar fyrsta - en ekki síðasta - ríkisstjórnarsamstarf varir höfum við komið mörgum góðum málum í gegn - og þeim á svo sannarlega eftir að fjölga. Hæst ber þar í mínum huga aðgerðaráætlun ríkisstjórnarinnar gegn mansali sem nú hefur verið samþykkt og gefur fyrirheit um að þjóðþrifamál sem Vinstri græn hafa talað fyrir frá upphafi vega verði nú loksins að veruleika.

Það sem gleður mig mest eru frumvörpin um bann við kaupum á vændi og að undanþáguheimild vegna nektardans verði felld út. -Ég vona í alvörunni að í framtíðinni komi börnin mín sem eru 6 og 9 ára gömul ekki til með að muna eftir þeim tímum þegar kaup á konum sem kynlífshjálpartækjum voru samþykkt af yfirvöldum. Eins gleðst ég yfir verkefnisstjórn um kynjaða hagstjórn sem mun leiða til vandaðari og skilvirkari nýtingu fjármagns. Auk þess er viðurkenningin sem í þessari ákvörðun felst á kynjuðum áhrifum fjárlagagerðar mikilvæg.

---

En eins og Steingrímur sagði áðan, þá verður fólki á. Honum varð á - og þingflokknum varð á. Þessi mistök hafa orðið til þess að varpa skugga á kæti femínista vegna aðgerðaráætlunarinnar. Það er erfitt að gleðjast þegar kynntar eru aðgerðir til að leiðrétta afleiðingar kynjamisréttis á sama tíma og kynjamisréttinu er viðhaldið.

Eftir skipan fyrstu karlanefndanna baðst formaður flokksins opinberlega afsökunar og sagðist aldrei ætla að gera þetta aftur. Ég tók þá afsökunarbeiðni alvarlega og trúði því að hann hefði lært af mistökum sínum. Tók meira að segja þátt í að verja skipanirnar - gagnvart sjálfum mér og öðrum. Það eru nefnilega ástæður fyrir öllu, og ekki einfalt mál að fylgja prinsippum í einu og öllu.

--- 

Karlanefndir um endurskoðun stjórnarskrár Íslands og stjórn Seðlabanka Íslands hafa nú, þrátt fyrir allt, verið skipaðar. Fyrir því eru margar ástæður, þingkjörnar nefndir þar sem flokkarnir tilnefna sína fulltrúa geta raðast með alls kyns hætti, við eigum jú bara einn fulltrúa í þessum ráðum og getum víst ekki haft áhrif á það hvernig hinir flokkarnir tilnefna.

Það eru alltaf ástæður. Líka fyrir mistökum. Ástæður sem jafnvel geta verið góðar. En Vinstrihreyfingin - grænt framboð, sem leggur til að kynjakvótar verði innleiddir til að tryggja jafna þátttöku beggja kynja í lýðræðiskafla kosningaáherslna sinna fyrir komandi kosningar hlýtur að geta gert betur en að skipa eingöngu karla í þær nefndir og þau ráð sem varða grundvöll íslensks samfélags.

Kæru félagar.

Auðmýkt er stórmannleg. Mistökin sem hafa verið viðurkennd þarf að leiðrétta. Afsökunarbeiðni dugar ekki lengur. Við verðum að sýna hvað í okkur býr og fyrir hvað við stöndum. Kvenfrelsisstefna flokksins er dýrmæt, ekki bara fyrir okkur flokksfólk, heldur samfélagið í heild sinni. Raunverulega virk þátttaka beggja kynja leiðir af sér gott og lífvænlegt samfélag þar sem allir fá notið sín.

Ég tek því heilshugar undir ályktunartillögu Kristínar systur minnar Tómasdóttur og félaga og vona að landsfundur sé sama sinnis. Kæru félagar - þorum, getum og viljum!

Sterk skilaboð frá yngra fólki

Skrár tengdar þessari bloggfærslu:

• Ályktunartillaga Kristínar

Ráðaleysi Gísla Marteins

Gísli Marteinn Baldursson er furðu lostinn. Bíður "efnahagspakka" ríkisstjórnarinnar í ofvæni, en þess í stað fær hann bara eitthvað sem kallast kynjuð hagstjórn og ekki er stafkrókur um á Vísindavefnum. Þetta veldur Gísla miklu hugarangri og telur hann fullvíst að fáir Íslendingar geti útskýrt aðgerðirnar í fáum setningum.

Það er sjálfsagt rétt hjá Gísla að þorri almennings eigi erfitt með að útskýra í hverju starf ríkisstjórnarinnar felst, enda flókin og yfirgripsmikil verkefni sem hún glímir við. Raunar skil ég ekki af hverju hann ætlast til þess að almenningur útskýri málið, nær væri að fylgjast með reglulegum blaðamannafundum (eða fréttum af þeim) til að afla upplýsinga.

Núverandi ríkisstjórn er í þann mund að koma í gegn þjóðþrifamálum sem lengi hefur verið talað fyrir á þingi, málum sem varða hag og velferð ekki bara heimila, heldur þjóðarinnar allrar. Þeirra á meðal eru frumvörpin um bann við kaupum á vændi og bann við rekstri nektardansstaða. Í samfélagi þar sem borin er virðing fyrir báðum kynjum og börn eiga að alast upp við samkennd og náungakærleik eru slík lög nauðsynleg.

Að lokum bendi ég Gísla Marteini á að hér er hægt að senda inn fyrirspurnir á Vísindavefinn, en lesefni um kynjaða hagstjórn má nálgast víða annars staðar, hafi hann raunverulegan áhuga fyrir hugtakinu.

Flókin og mikilvæg mál

Viðfangsefni stjórnmálanna eru misflókin. Það veit ríkisstjórn Íslands og allir Alþingismenn þjóðarinnar. Sumt af því sem Alþingi og ríkisstjórnin glímir nú við virðist óvinnandi vegur. Þar á meðal eru verkefni á borð við:

• Að afstýra þjóðargjaldþroti
• Að lágmarka atvinnuleysi þegar horfur eru verri en nokkru sinni
• Að semja við Breta í erfiðustu milliríkjadeilu okkar Íslendinga í áratugi
• Að framfylgja jafnréttislögum

Þetta síðastnefnda er þó alls ekkert flókið. Það snýst um að muna að kynin eru tvö og að sjónarmið beggja skipta máli. Skilningur á kynjakerfi samfélagsins spillir ekki fyrir, né heldur viðurkenning. Fyrst og fremst er þó nauðsynlegt að finna hjá sér þörf og metnað til að uppræta kynjakerfið og stuðla fyrir alvöru að jafnrétti kynjanna í samfélaginu.

Mér er fyrirmunað að skilja hvernig fólk sem treystir sér til að stýra Íslandi við þessar aðstæður getur leyft sér að setja fyrir sig að flókið sé að fylgja jafnréttislögum, eða anda jafnréttislaga ef því er að skipta. Í raun sé ég enga ástæðu til að skilja það. Ég sætti mig ekki við það.

Íslensk stjórnvöld eiga undir öllum kringumstæðum að fylgja eigin stefnu. Í dag, þegar ríkisstjórn tveggja flokka sem kenna sig við kvenfrelsi er við völd er ekkert sem réttlætir nefndaskipanir þær sem hér um ræðir.

Bankaráð Seðlabanka ólöglega skipað?